Босна и Херцеговина изгуби повеќе од 620.000 жители од последниот попис во 2013 година, што е последица на масовната емиграција и намалениот природен прираст во земјата која има бројни политички и економски проблеми, беше објавено денес во Сараево.
Збирката трудови „Демографски промени во Босна и Херцеговина од 2013 до 2024 година“ ја презентираше Академијата на науките и уметностите на БиХ и во неа се наведува дека трендот на масовно иселување, особено на младите луѓе, е особено загрижувачки.
БиХ го спроведе својот единствен повоен попис во 2013 година
Повеќе од половина од граѓаните по потекло од БиХ денес живеат во странство. Политичката нестабилност, чувството на несигурност и економската неизвесност дополнително ја зголемуваат намерата за заминување, беше наведено на промоцијата на збирката трудови.
Според извештајот, населението на БиХ се намалило за 626.903 жители од 2013 до 2023 година. Според анализите спроведени од Академијата на науките и уметностите на Босна и Херцеговина, населението во 2023 година изнесувало 2.904.256, додека во 2013 година имало 3.531.159 жители.
Босна и Херцеговина го спроведе својот единствен попис по војната во 2013 година, кога официјално беа регистрирани 3.531.159 жители, а резултатите беа објавени три години подоцна. Оттогаш не е спроведен нов попис, а статистичарите објавуваат проценки врз основа на достапните податоци.
Академик Пејановиќ: Помалите заедници се особено изложени на ризик
„Промената во структурата на населението веќе влијае на пазарот на трудот, стареењето на населението и општиот квалитет на живот. Внатрешните и сезонските миграции стануваат сè поизразени, па затоа е потребно итно да се спроведат активни миграциски политики што ќе спречат заминувања и ќе го поттикнат враќањето, во спротивно последиците за општеството и економијата ќе бидат долгорочни и сериозни“, рече проф. д-р Аднан Ефендиќ.
Академик д-р Мирко Пејановиќ изјави дека „политичката нестабилност, чувството на несигурност и економската неизвесност дополнително ја зајакнуваат намерата за заминување“. Тој наведува дека помалите области од кои младите луѓе масовно заминуваат се особено изложени на ризик.
„Доколку локалните заедници не се зајакнат итно и не се започнат долгорочни мерки за рурален развој, многу од овие области ќе се соочат со целосно исчезнување на населението“, предупреди Пејановиќ.
