Фондот за здравствено осигурување на Македонија доби мислење со резерва од страна на Државниот завод за ревизија (ДЗР) за точноста на финансиските извештаи и за усогласеноста на неговото работење со законската регулатива за 2023 година. Слично мислење било дадено и за работењето на Фондот во 2022 година.
Ревизијата откри низа системски слабости и нерешени прашања што влијаат врз транспарентноста, законитоста и ефикасноста во работењето на Фондот.
Според ревизорскиот извештај, дел од недвижниот имот на Фондот – објекти и земјиште – сè уште нема регулиран имотно-правен статус, а нивната вредност не е целосно утврдена и евидентирана во деловните книги.
Фондот не води целосна евиденција на побарувањата за дадени аванси за лекување во странство, ниту има воспоставено ефективни контроли над фактурите од странски болници. Тоа резултирало со судски тужби против институцијата.
Постапката за упатување пациенти на лекување во странство е оценета како непрозрачна и нефункционална – не е обезбедена правна заштита за осигурениците, ниту постои систем за следење на успешноста на лекувањата.
Ревизорите посочуваат и на сериозни пропусти во ИТ-системот на Фондот. Недостигот на ИТ кадар и отсуството на ИТ стратегија довеле до сајбер напад, што дополнително го загрозува системот и сигурноста на податоците.
Контролата врз здравствените установи е оценета како недоволна. Не се потврдуваат сите фактури за извршени услуги, а постои и доцнење во постапувањето по извештаи од извршени контроли каде се констатирани неправилности. Исто така, е утврдена слаба динамика на наплата на повеќе исплатени рецепти и слабости во контролата на фактурите за лекови.
Меѓу прашањата кои ДЗР ги нагласува е и отсуството на целосни податоци за побарувањата по основ на неплатени придонеси за здравствено осигурување, особено за побарувањата пред 2008 година, за кои наплатата е неизвесна.
Фондот во моментов е вклучен во повеќе судски постапки, како тужител и како тужена страна, што може дополнително да го оптовари буџетот. Референтните цени на здравствените услуги не се ажурирани и не ги одразуваат реалните трошоци, а Министерството за здравство не ги исплатило во целост придонесите за граѓаните кои не се осигурени, што дополнително ја влошува финансиската состојба на Фондот.
Клучен наод е дека не е обезбедено вистинско купување на здравствени услуги – наместо тоа, Фондот обезбедува средства за функционирање на јавни здравствени установи кои не успеваат да ги испорачаат планираните здравствени услуги.
Во извештајот се укажува и на потребата од ажурирање на Листата на лекови на товар на Фондот, како и на внатрешни организациски слабости – не се пополнети раководни позиции, што создава ризик од нејасно распределени одговорности.
Раководството на Фондот доставило забелешки на нацрт-извештајот од ревизијата, кои, според ДЗР, главно се однесуваат на активности преземени по дадените препораки или објаснувања за констатираните состојби.
