Еурофарм Пелистер во 12.коло ја забележа третата победа сезонава во Лигата на шампионите. Битолчани предводени од брилијантниот Никола Митревски, го победија Динамо Букурешт со 25:24 (12:13).
Пелистер, во пресрет на последните две кола, ги задржа шансите за пласман во нокаут фазата. Македонскиот првак има осум бода колку што по победата над Фуксе Берлин има и Висла Плоцк.
Поради лошата реализиција на седмерците (2/6), Пелистер стравуваше за победата до последните пет секунди. Победата на „зелените“ им аја овозможи најдобриот поединец на натпреварот, голманот Никола Митревски кој забележа 16 одбрани, вклучувајќи и клучната на пет секунди до крајот кога му фати „жива топка“ на Али Зејн.
Инаку, Пелистер подобро влезе во натпреварот, во 10.минута ја создаде најголемата предност (7:4). До крајот на полувремето Динамо трпеливо ја топеше разликата, а периодот во кој Пелистер не постигна гол од 25. до 30.минута, гостите го искористија да заминат на одмор со гол предност.
Шериодот на неефикасна игра Пелистер го префрли и во вториот дел, во првите осум минути Битолчани постигнаа само еден гол, па Динамо во 38.минута имаше предност од два гола.
Со серија од три гола Пелистер повторно го презеде водството и до крајот буквално се играше гол за гол. Пелистер не ги користеше шансите да си обезбеди мирен финиш, на крајот Митревски ја сочува победата, откако во последниот напад на Пелистер, на 20 секунди до крајот Хосни ја „продаде“ топката.
Најефикасни во редовите на Пелистер беа Тајник со шест, односно Кузмановски и Радовијевиќ со по пет гола.
Во претпоследното коло, на 27.февруари, Пелистер ќе му гостува на Фуксе во Берлин.
